මට පේන ලෝකයේ
ඇතත් විසිතුරු පාට
කළුපාට විතරමයි
තියෙන්නේ මහරෑට
මගෙ දූට පේන්නේ
හැමදාම ඒ පාට
කවුරුවත් නොකිව්වට
ලස්සනයි මහරෑට
රතුපාට ඇස් තියන
රකුසො පිරිලා බොහොම
සුදුපාට ඇඳගත්තු
බිල්ලො දැන් හැමතැනම
සමනලුන් වෙස්ගත්ත
අමනුස්ස මනුසත්තු
නොදකිනා එක තමයි
පින කලින් කරගත්තු
හිරු නැගෙයි හැමදාම
එළිය දෙන්නට ලොවට
මගෙ දුවේ දන්නවද
ඒ ඉරට ඇස් නොමැත
දවසකදි ජීවිතේ
හැකිවුණොත් ඔය හිතට
එළිය දීපන් දුවේ
ඇස් අන්ධ ලෝකයට.....
